خويا لعزيز! بطّال وما عندك ما تعمل في حياتك؟ تاخو في المصروف من عند أمّك وإلّا بوك وإلا أختك وديما عايش كالطفيليّات على عرق لعباد؟ جاهل وماكش قاري ومستوى ثالثة فراشة؟ فصالة وكلوشار في الحومة؟ تموت على التجلطيم على الناس وفي كلّ محضر تحب تحضر؟ سكّارجي وزبراط وإلّا حتّى زطّّال؟ ناقم على ولاد الحومة الشقانس وتحب تمرّلهم عيشتهم؟ ماعملت شيء في حياتك ينفع؟ فدّيت من الحاكم ديما صادم عليك؟ إيجا معانا وأعلن توبتك بش ندخّلوك للجنّة وإنضم لإخوانك السلفيّين لنصرة اللّه والإسلام ونوعدوك بكل يوم مظاهرة وعرك وضرب وتجلطيم على خلق ربّي، كلّ يوم محاضرة في جامع والفطور والعشاء خالص من عند إخوتك الخوانجيّة، كل يوم نصدموا على مثقّف أو صحافي أو دكتور نكفّروه ونضربوه... وكلّ هذا من غير ما يمسّك الحاكم! الناس تجي معاك ونتّهموا إلّي يحب يضربك بالكفر ومحاربة الإسلام! وبذلك تولّي عندك حصانة من فئة الشعب الجاهل! فاش تستنّى؟ ربّي لحيتك وجيب القميص والعرّاقية ومرحبا بيك في كلّ وقت!